كتبت : سماء كمال
كل شيء إذا زاد عن حده انقلب إلى ضده .. قاعدة سارية في كل نواحي حياتنا
اهتمامك الزيادة بأولادك قد يخلق طفل مغرور يريد أن يرى دائماً الإهتمام في عيون الآخرين
وخوفك المستمر على أولادك قد يولد لديهم الشعور بالجبن وعدم تحمل المسئولية
وكذلك الأوامر والنواهي وتدقيقك المستمر على الكبيرة والصغيرة مع أطفالك قد يزيد من لامبالتهم وعدم إنصاتهم لكلامك.
وده مش بس مع أولادنا .. كمان
علاقتك الزائدة مع أصدقائك قد تولد مشاعر يصعب عليك تجنب تبعاتها وقد يخنق العلاقات ويدمرها
ف بلاش تخنقوا العلاقات وتدمروا الصدقات تحت مسميات خاطئة انتم من ابتدعها وليس لها أساس من الصحة.
وحتى مع زوجك
اهتمامك الزائد بزوجك قد يفسد العلاقة على عكس مانتصور وقد يضيع حقوقك الشخصية
مش لازم تقومي بدور أمينة طول الوقت وترضيه ع حساب حقوقك .. عوديه على إحتياجاتك .. لأنك إنسانه من دم ولحم مش إنسان آلي.
وحتى دراستك وعملك
اهتمامك الزائد بالعلم والعمل قد يولد لديك الكبت والإحباط والفتور .. لأنك مهما حققتي من النجاح في حياتك .. شعورك بالكبت والحرمان من حاجات تانية أهملتيها في حياتك .. حيدخلك في دايرة مغلقة من الكآبه والإكتئاب.
المغالاة الزيادة في أي علاقة ممكن تدمرها .. المرونة والوسطية إكسجين العلاقات .. ف لكل مقام مقال
وبلاش نبالغ في سلوكنا وردود أفعالنا .. سواء كنا فرحانين أو زعلانين .. فلا إفراط ولا تفريط
وقبل مانحضر العفريت ونتصدم بيه ومنعرفش نصرفه .. نوازن في علاقتنا ونعدل الميزان في كل شئون حياتنا.
لأننا إحنا اللي بنغذي العفريت بإستهتارتنا وتهاونا لحد مايكبر ومبنعرفش نتصرف وقتها ونرجع نبكي على اللبن المسكوب ..
مشاعرنا الجميلة شئ رائع لكنها لها طاقة ذات حدين ..
ممكن نستخدمها في صالحنا وصالح أولادنا وحياتنا وكل اللي حوالينا ونبني بها حياة هادية
وممكن نهد بها كل شئ جميل حوالينا وجوانا وجواهم.
اضبط مشاعرك واتحكم فيها قبل ماتسيطر عليك وتهد كل جميل حواليك
متجيش على نفسك عشان خاطر حد .. اعط نفسك حقوقها زيها زي أي حد وزود شوية عشان تقدر تساعد اللي حواليك
واتعلم تقول لأ وقت اللزوم .. مش كل حد يطلب منك حاجة لازم تقوله آمين
ومتخفش لسه الفرصة أدامك تعدل المايل بس ابدء بشويش .. الناس حتتعود .. أولادك حيتعودا .. وزوجك حيسلم لانه حيعود عليه بالنفع .. المهم أنك تكون فاهم أنت عايز إيه .
